Үер, усны аюулаас хэрхэн урьдчилан сэргийлэх талаар мэдлэгээ дээшлүүлье

68638649_284209989109908_3385717715799900160_n-2.jpg

Үер гэж гол, мөрний усны түвшин хэвийн хэмжээнээс дээшлэн савнааасаа хальж, урсгал нь хэт түргэсэх, хуурай сайр, жалга даган усны хүчтэй түрэлт, урсгал бий болохыг хэлнэ. Үерийг гол мөрний, шар усны уруйн гэж ялгадаг. Удаан хугацаагаар үргэлжилсэн болон аадар бороо орсон, өвөл, хавар орсон их хэмжээний цас богино хугацаанд хайлсны улмаас гол мөрний, шар усны болон уруйн үер болох нөхцөл бүрддэг байна.

Үерусны аюулаас урьдчилан сэргийлэх болон танин мэдэх уламжлалт аргууд

  • Цагаан сарын шинийн нэгэнд хар хулгана өдөр учирбал усны үер болох
  • Хавар нь хүйтэн бол зун нь хур бороо, мөндөр ихтэй
  • Зуны уур амьсгал орох өдөр умраас салхилбал үер болохын шинж
  • Цаг агаар сайхан байхад бүгчим халуун болж, шувууд донгодохоо боливол аянгатай бороо орохын шинж
  • Аалз торныхоо дунд шигдэн нуугдсан байвал удахгүй борооших
  • Тахиа дуугаа хураавал 2-3 хоногийн дараа бороо орох
  • Бороо орохын өмнө мэлхий хашгирах
  • Усны гадаргуу дээр загас үсрэн гарч үзэгдвэл бороо орох
  • Сохор номин газар дороос гарч ирвэл удахгүй бороо орох
  • Тарвага нүхний амсрыг тойруулж чулуу, шороогоор хүрээлбэл бороо орж, их үер болохын шинж
  • Хонь, ямааны хамар түгжирч, шуухинан дуугарч байвал тэнгэр бүрхэж, хур тундас орох
  • Цагаан цэцэг хангай газар зуны эхэн сард их ургавал зундаа хур ихтэй
  • Зуны цагт үнээ тугалдаа хоргодож , мөөрөлдвөл бороо орох
  • Багваахай цэцэг дэлбээгээ хумивал тэнгэр бүрхэж бороо орох
  • Зун ой шуугивал тэнгэр эвгүйтэж бороо орох 

Үер усны аюулаас хэрхэн сэргийлэх вэ?

  • – Үер усны аюулаас урьдчилан сэргийлэх сэрэмжлүүлэг, мэдээ, дохиог хэвлэл мэдээллийн хэрэгсэл, мэдээллийн бусад эх сурвалжаас тогтмол хүлээн авч сэрэмжлэх, бусдад дамжуулах
  • – Тэнгэрийн байдал, үүл, салхины чиг, мал амьтны хөдөлгөөн, араншинг шинжих гэх мэт үер усны аюулаас урьдчилан сэргийлэх уламжлалт аргаас суралцах
  • – Гэр, хашаа, саравч, орон байрыг үерийн усны зам, голын гольдрол, гуу, жалга, хуурай сайр, ус хальдаг эрэг, татамд барихгүй байх
  • – Үерийн аюултай бүс нутгаас нүүх
  • – Үер, усны аюулаас хамгаалах далан, суваг, шуудуу, хашлага барих
  • – Үер, усны аюулын талаар хүүхдэд анхааруулга, сэрэмжлүүлэг өгөх
  • – Хүүхдийг хараа хяналтгүйгээр гол мөрөн, нуур, цөөрмийн орчимд тоглуулахгүй, орхихгүй байх
  • – Чухал бичиг баримт, үнэт зүйлсээ үерийн усанд урсах, норохоос хамгаалсан найдвартай газар хадгалах, түүнийг гэр бүлийн гишүүд мэддэг байх
  • – Цэвэр ус болон хүнсний нөөц, дулаан хувцасыг усанд автахааргүй орчинд хадгалах
  • – Гэнэтийн ослын болон эд хөрөнгийн даатгалд хамрагдах
  • – Өндөр хүчдэл, цахилгааны дор гэр, сууцаа барихгүй байх

Үерусны аюулын үед юу хийх хэрэгтэй вэ?

  • – Үерийн аюулаас хамгаалах уламжлалт аргыг ашиглан эрүүл мэнд, амь нас, эд хөрөнгөө аврах, хамгаалах /гэрийн хаяагаа шуух, бэхэлгээ хийх, тогоо хөмрөх, хүүхэд, жирэмсэн эх, өндөр настан, хөгжлийн бэрхшээлтэй хүмүүсийг аюулгүй газар байлгах/
  • – Байшингийн дээвэр, ургаа мод зэрэг аль ойрхон өндөрлөг газар гарах
  • – Үер бууж болзошгүй хавцал, хонхор, нам дор газраас хол байж аль ойр байгаа өндөрлөг гарч тэндээ хүлээх
  • – Цахилгаан хэрэгслийг хүчдэлээс салгах
  • – Усархаг, үргэлжилсэн хүйтэн бороотой үед болон аадар, мөндөр орж байхад мал хариулах, эрэлд явах, аян замд гарахыг хойшлуулах
  • – Өрх гэрт гарсан хохирол болон өөрт байгаа мэдээллийг, холбогдох байгууллага /эрүүл мэнд, онцгой байдал, нутгийн захиргаа гэх мэт/-д мэдээлэх, бусдад хүргэх
  • – Гол мөрөн үертэй үед усанд орох, гол гатлах, зугаалах, аж ахуйн үйл ажиллагаа эрхлэхгүй байх, загасчлах, мал услах, туухгүй байх

Үер, усны аюулын үед өрх гэрт зайлшгүй бэлэн байвал зохих зүйлс

  1. Ундны ус
  2. Илчлэг хоол хүнс
  3. Мэдээлэл холбооны хэрэгсэл /радио, гар утас/
  4. Эмийн сан, ариун цэврийн хэрэглэл, ариутгалын бодис
  5. Гэрэлтүүлэх болон дохио өгөх хэрэгсэл /гар чийдэн, лаа, шүдэнз, тод өнгийн даавуу, дарцаг, утаат дохио, толь, шүгэл/ гэх мэт
  6. Дулаан хувцас, цув, усны гутал, хөнжил
  7. Түлээ түлш
  8. Хүүхдийн хийлдэг тоглоом, ном, газрын зураг
  9. Гарын доорхи материал ашиглан хөвөх хувцас, хэрэгсэл бэлтгэх
  10. Хүрз, жоотуу, олс, алчуур бээлий

Үерусны аюулын дараа юу хийх хэрэгтэй вэ?

  • – Өөртөө болон бусдад туслах
  • – Эвдэрч нурсан газраас холдож аюулгүй газар очих
  • – Шаардлагатай бол эмнэлгийн байгууллагад хандах
  • – Үерийн усаар халдварт өвчний нян тээгддэг тул цэвэрлэгээ хийх, энэ ажилд мэргэжлийн байгууллагаас туслалцаа авах
  • – Барилга байгууламжийн гадуур устай байвал дотогш оролгүй хүлээх
  • – Үерийн ус барилгын суурийг гэмтээж, барилга нурах аюултайг анхаарах
  • – Хийн шугам гэмтэж хий алдагдах, цахилгаан дулаан болон цэвэр усны шугам сүлжээ эвдэрсэн байх магадлалтай тул холбогдох мэргэжлийн байгууллагаас зөвшөөрсөн тохиолдолд гэртээ эргэж очих
  • – Ундны усыг заавал буцалгаж хэрэглэх
  • – Гараа тогтмол савандаж угаах
  • – Үерийн усанд норсон хүнсний бүтээгдэхүүнийг устгах, хоол хүнс бэлтгэдэг болон ахуйн хэрэглээний сав суулгыг буцалгаж ариутгах
  • – Булаг, худгийн усыг шавхаж цэвэрлэх
  • Гэр хороололд амьдардаг бол бие засах газар, муу усны нүх /сав/-ийг ариутгах, цэвэрлэх гэх мэт
scroll to top